Rayat Sangsara
Balukar Teu Narima Hakna
Kénging Rudi H. Tarmidzi jeung Ensa Wiarna
Dina acara Hari Anak Nasional (HARNAS) sareng Gupernur Jabar [Potrét/Ilustasi: dok.pribadi]
Harepan hirup jeung huripna jauh tangéh. Nu écés mah, kasangsaraan téh
nyampak di mana-mana? Naon sababna? Naha enya balukar rahayat teu narima
hak-hakna? Hj. Lilies N.S. Budiman, SH.MH., medar pamanggihna. ***
Mun kaparengan ngaliwat ka lebah dinya, leumpang gé kudu nyangigir,
lantaran heurin. Dimana éta téh? Di salah sahiji tempat di kota Bandung.
“Kumaha mun nu maot kudu digotong ka lebah dinya?” kitu pananya Hj.
Lilis ka urang dinya. Jawaban padumuk éta tempat téh, ”Kapaksa wé layon
gé digotong heula ku samak!”
Hirup walurat kawas kitu, remen kasaksén ku Hj. Lilis mah. Malum, da
remen kekeleyengan ngalanglang lembur luyu jeung kagiatanana. Kituna
téh, lantaran ieu ‘aktivis’ wanoja téh icikibung dina rupa-rupa widang
kamasarakatan. “Nyaksian kahirupan kawas kitu, tangtos matak ngahelas,”
cek Hj. Lilies N.S. Budiman, waktu tepung ditengah-tengah kasibukanana
minangka ketua panitia HUT Ikatan Persaudaraan Haji Indonesia Jawa Barat
sareng mieling Isro Mi’raj di gedung Bhayangkara Bandung.
Rasa tugenah kawas kitu, ku inyana mah teu ukur disidem. Da, upama
kaparengan aya waktu ngobrol jeung ‘pajabat’ ogé sok dicaritakeun
ditepikeun deui sangkan nu kasaksén goréng téh aya parobahan. Ngan,
mémang, ukur saran jeung kahayang, da teu bisa maksa jeung teu boga
kakutan keur ngalarapkeun kahayangna.
Balukar Salah Sok
Kamiskinan loba sababna. Ngan, da rahayat mah kumaha nu ngurusna.
Geusan ngaraharjakeun masarakat, kudu aya waragad, di antarana téh.
“Ngan, upama waragad salah sokna, tangtos wé moal seueur mangpaatna,”
cek ieu Magister Hukum téh.
Kahayang rahayat mah basajan. Asal cukup pangan, sandang, jeung boga
padumukan. Eta atuh nu pokona mah. Isedna ti dinya, katalingakeun
kasehatan katut bisa nyakolakeun barudakna. Ngan, kahayang nu basajan
kawas kitu téh, ku rahayat leutik mah hésé pisan kahontalna.
“Bantuan-bantuan sosial gé apan loba kénéh nu salah sokna. Nu mistina
kabagéan teu narima bantuan,” pokna.
Salah sok, gambaran nu boga wewenang teu daria ngalaksakeun pancenna.
Kanyataan kitu, balukarna mah manjang. “Antukna, nu ripuh gé mingkin
ripuh,” pokna semu hanjelu.
Urusan karaharjaan, mémang loba patula-patalina. Lebah dinya mah
gumantung kana masing-masing kaayaan masarakatna. Upama rahayat purah
tatanén, apan karaharjaan téh miang tina upaya ngolah lahan, nyadiakeun
tatanénna. Upama hasil tatanén sangkan hadé, ngarap patani mucekil
hasilna, sagala rupa kabutuh patani gé kudu kacumponan. Bibitna kudu
hadé, nyaian sawahna cukup, bibitna sadia, ogé gemukna luyu jeung
kabutuhan. “Tah, hal-hal anu sapertos kitu téh kedah janten panalinga
pamaréntah,” pokna.
Kitu deui mun nu dumuk di pakotaan, tetep butuh rohang-rohang geusan
mekarkeun poténsi dirina. Nu daragang, butuh tempat jeung jaminan
dagangna untung. Atuh kitu deui nu ngajual jasa, misti meunang
kauntungan geusan karaharjaan hirupna. “Pasualan-pasualan nu tumali
sareng kabutuh masarakat kedah janten panalinga daria pamaréntah,” pokna
deui.
Harepan Hj. Lilis saperti kitu, mémang lain pamohalan. Da, éta mah
angen-angen sakumna masarakat. Lantaran, nu boga kakawasaan matéahkeun
sakumna poténsi masarakat katut sumber daya nu aya téh pamaréntah nu
dilaksanakeun ku masing-masing pajabatna.
Ngabebenah kahirupan masarakat, ceuk ieu ketua Biro Hukum jeung
pulitisi Partéy Golkar Jawa Barat téh, kudu ‘ngaréformasi’ birokrasi!
Lantaran, aturan-aturan mah kurang kumaha alusna jeung kumplit deui.
Hartina, kari prak ngalaksanakeunana.
Ngalaksanakeun pancén gawé, butuh pasaratan anu jinek sangkan éta
wewenang téh neueul kana kabutuhan masarakat. Cindekna, pajabat téh kudu
‘amanah’ dina ngalaksanakeun pancénna.
Pajabat nu hadé, lian ti mampuh ngalaksanakeun pancén gawéna, ogé
mampuh nempatkeun pihak séjén dina tempat anu merenah. Maksud Hj. Lilies
mah, mun ogé nempatkeun pihak séjén dina hiji jabatan, ogé kudu dumasar
kana kamampuhanana, lain titimbangan séjénna.
Pajabat nu boga wewenang ogé ulah kéna-kéna boga kakawasaan. Kudu tetep
ngukur ka kujur. “Ulah atuh rangkep-rangkep jabatan téh,” pokna.
Acrub kana Pulitik
Icikibung dina rupa-rupa organisasi, Hj. Lilies engeuh kacida, mun
hayang boga pangaruh nu ‘matih’ mémang kudu boga wewenang. Geusan
mémérés paripolah eksekutif, hartina gé butuh legislatif nu bener-bener
mampuh ngalaksanakeun pancénna. “Kudu boga legislatif nu bener-bener
ngarti tur mampuh ngalaksanakeun pancén gawéna,” pokna.
Upama ieu aktivis wanoja ahirna léah haté ancrub kana pulitik, ogé
lantaran kajurung ku kanyataan anu kasaksén ku dirina. Kakawasaan
eksekutif kudu ditalingakeun ku legislatif. “Hartosna, kamampuhan
legsilatif janten bagian nu utami dina upaya ngahontal karaharjaan
masarakat,” ceuk ieu urang Bandung bibit buit tatar Sunda téh.
Ngurus daérah, teu cukup ngandelkeun eksekutif. Lantaran kawijakan,
saperti Perda, apan kudu bener-bener keur kapentingan masarakat.
Hartina, ceuk ieu direktur utama PT. Garuda Wahana Rizky téh, para
wakil rahayat tingkat propinsi téh kudu bener-bener boga kamampuhan
ngalaksanakeun pancénna. “Nu milih gé kedah pinter milihna, ulah salah
milih,” pokna dibarung mésem.
Antara nu dipilih jeung nu milih, ceuk Hj. Lilies mah, kudu silih
pikawanoh. Nu milih kudu wanoh kana adeg-pangadeg jeung jenglengan calon
nu rék dipilihna. Kitu téh sangkan teu nyalahan, teu matak kaduhung
ahirna. Nu gamapang cirina keur nu milih, piliheun téh kudu dititénan
sagala rupana, kamampuhanana, ogé tapak lacak (track record-na) dina
ngabdikeun diri di masarakat. “Ulah milih ukur kabibita ku jangjina
wungkul,” pokna semu ngawawadian.
Ngabdi keur Masarakat
Suksesna Hj. Lilies N. Budiman, keur dirina mah éstuning kurnia Alloh
Swt. Hususna, upama nineung ka mangsa keur budak. Kanyaah indung,
kaheman bapa, karasa pisan ku Hj. Lilies. Kénging atikan ti sepuhna H.
Sulaeman sareng Hj. Hindun, keur Lilies mah éstu nu nguatan pisan dina
lalampahan hirup saterusna. Mana nu pimaslahateun mana nu pimadoroteun
keur Lilies harita, sepuhna kacida nalingakeunana. Sapertina waé, basa
Hj. Lilies keur leutik, keyeng hayang jadi Hakim, sepuhna mah ngarasa
teu cocok. Lantaran Lilies kaasup wanoja nu teu wasa ngalawan rasa.
“Kapungkur mah hoyong pisan janten hakim, namung sepuh teu ngawidian,
lantaran abdi mah, cenah, kalebet teu wasaan,” saurna nineung ka mangsa
keur budak.
Upama kiwari Hj. Lilies suksés dina sababaraha widang, mémang apal
pisan kana jurusna. Inyana téh pangusaha sukses nu bisnisna terus mekar.
Ngan usahana teu sing keur sadirieun, tapi teu weléh méré mangpaat keur
balaréa. Ku kituna, lian ti kagiatanana kana bisnis, Hj. Lilies ogé
loba aktip dina widang sosial jeung kagamaan. Ieu carogé Budiman deuih
resep deui kana organisasi jeung pulitik. Nya ku lantaran kitu, deuih
jadi loba baladna. Malum, organisasi nu diurusna ogé téh rupa-rupa
naker. Di antarana waé dina widang sosial, Hj. Lilies aktip di Kaukus
Perempuan Politik Indonesia Provinsi Jawa Barat, Laskar Ampera Arif
Rahman Hakim (LARH 66) Provinsi Jawa Barat, Dharma Wanita Provinsi Jawa
Barat Unit Industri Pesawat Terbang Nusantara (IPTN), wakil ketua
IPPRISIA Provinsi Jawa Barat, jeung widang sejenna. Kitu deui dina
widang kaagamaan, aktif di Ikatan Persaudaraan Haji Indonesia (IPHI)
Provinsi Jawa Barat, Dewan Masjid Indonesia (DMI) Provinsi Jawa Barat,
jeung widang séjénna. Di widang politik, aktif di Kesatuan Perempuan
Partai Golkar (KPPG) Provinsi Jawa Barat. “Insya Alloh, sanaos seueur
kasibukanana, tapi nu penting mah hoyong ngabdi keur masarakat,” saurna
ieu politisi Golkar téh daria.
Kitu deui dina widang bisnis, ieu politisi wanoja Sunda, kiwari mancén
Direktur Utama PT. Garuda Wahana Rizky, wakil direktur utama PT.
PUTRADHARMA CIPTA ADILAKSANA ogé di widang Tecnical Assisten, nyaéta
ngokolakeun kaasup ngadatangkeun tanaga ahli pesawat terbang ti luar
negeri keur nyieun Pesawat Terbang N-250 di PT. IPTN (Industri Pesawat
Terbang Nusantara) nu kiwari jadi PT. DI. Keur Hj. Lilies, karepna
ngajalankeun widang kitu, lantaran kajurung ku hiji-hijina pausahaan
Indonesia (Pribumi) dina widang tanaga ahli pesawat terban. Lian eta, nu
leuwih penting hayang némbongkeun kamampuh kaum wanoja. “Alhamdulillah,
ti antara padamelna pameget, abdi ngan hiji-hijina. Ieu buktos wanoja
ogé mémang mampuh,” pokna.
Sanajan Hj. Lilies kiwari sibuk mancén jeung pangabdianana ka saban
wilayah, tapi dirina teu weléh tibelat ka sarakan Garut. Atuh keur ieu
Hj. Lilies nu pernah jadi pangurus koperasi ‘terbaik ‘ Jabar gé, dina
waktu rinéh mah sok tibelat ka lembur pamatuhanana, kaasup nalingakeun
lembur karuhunna.
Tidak ada komentar:
Posting Komentar